زمان ياااه جميلة اوى كلمة زمان بيوت زمان .. رجالة زمان .. ستات زمان .. شوارع زمان .. قهاوى زمان .. بياعين زمان .. ومحلات زمان .. لسه فاكرين زمان ..
حارة الخضرية الجميلة ببيوتها القديمة ومشربياتها وناسها الجدعان عم عويس والحج رأفت وخالتى أم سمير وستى حميدة وبليلة عم سيد وصوته وهو خارج من باب الحارة " يا فتاح يا عليم يا رزاق يا كريم " ويجر عربيته ويسترزق بقرشين مبروكين وعشان قلبه كبير ميسترزقش مرتين قبل ما يسترزق خالى عبده بقرشين مبروكين .
جيران طيبين بياعين بالقليل راضين ومستكفيين والحلال يكفى والخير يفيض .. ، وستات زمان باليشمك والشال فوق العباية مستورين تنادى من ورا الشبابيك على خالتى وفدية تبعتلها وقية زبدة وحتة جبنة قريش وشوية فول حراتى ورغفين عيش .
يا سلام على خير زمان وبياعين زمان وبركة إيدايهم فى الميزان .. ، وقهوة زمان والمصطبة وشيخ الحارة الحج عبده البجورى والدكتور سعيد والأنبا كرولس والمهندس حمدان والأسطى فاروق وابنه عصام وحكاويهم الحلوة وروحهم الطيبة ولمتهم زمان ..
مش عارف ايه اللى غير الحارة وغير الجيران مين اللى ساكن فوق؟ ومين الجار الجديد؟!! مش مهم ما احنا مش من زمان حتى صوت الست سومة اختفى من زمان والواحد مبقاش يسمع ولا صوت ولا لحن ولا حتى كلمات ، حتى البياعين مش دول بتوع زمان ده عايز يبيع ويغش ويكسب والسلام ..
ولا ده كمان لبس الستات زمان ، وايه اللى غير القهاوى وخلها دوشة وصداع بدل الفكر والادب والاحترام والحوار ..
حتى اللقمة مش من خير زمان اللى فاسد والمرشوش والمغشوش كله عشان حبة فلوس.
اكيد فى حاجة غلط والاصح أنه احنا مش فاكرين زمان ..
قلم حر
منقووووووووووووووووول
